ဒို့မြန်မာ လူမှုကွန်ရက်အတွင်း အသုံးပြုသူများအနေဖြင့် မိမိသိရှိလိုသော အချက်အလက်အသေးစိတ်ကို ငွေပေးချေ၍ လေ့လာခြင်းဖြင့် Page တည်ထောင်သူများမှ ဝင်ငွေရရှိစေရန် စီစဉ်ထားခြင်း ဖြစ်သည်။
ငွေပေးချေမှုအတွက် ဒိုးပြားများကို အသုံးပြုသူများမှ ပိုင်ဆိုင်ထားရန်လိုအပ်ပြီး အဆိုပါ ဒိုးပြားများကို မိုဘိုင်းဖုန်းမှတစ်ဆင့် ဝယ်ယူနိုင်သည်ဟု သိရသည်။
ကွန်ရက်အသုံးပြုသူများသည် Post များ၊ ဓာတ်ပုံများနှင့် ကဗျာများကို တစ်ကြိမ်တင်ဆက်လျှင် ဒိုးပြားတစ်ခုကို ရရှိမည်ဖြစ်ပြီး ဒိုးပြားများ ပိုမိုပိုင်ဆိုင်လိုပါက ဒိုးပြား ၂၀၀ လျှင် ကျပ်ငွေ ၁၀ ဖြင့် MPT မိုဘိုင်းဖုန်းလိုင်းအသုံးပြု၍ ၀ယ်ယူနိုင်ကြောင်း ဒို့မြန်မာလူမှုကွန်ရက်မှ မနီနီလွင်က ပြောသည်။
ဒို့မြန်မာလူမှုကွန်ရက်၌ Page တည်ထောင်ထားသူများသည် အခမဲ့ဖော်ပြလိုသည်များကို ဖော်ပြနိုင်ပြီး ငွေကြေးရယူ၍ ဖော်ပြလိုသော အသေးစိတ်အချက်အလက်များကိုလည်း ဒိုးပြားအရေအတွက်တစ်ခု သတ်မှတ်၍ ရေးသားဖော်ပြနိုင်မည် ဖြစ်သည်။
Page တည်ထောင်ခြင်းကို ၂၀၁၅ ခုနှစ်အတွင် ထွက်ရှိလာသည့် ဗားရှင်းအသစ်၌ ခွင့်ပြုပေးခဲ့ခြင်းဖြစ်ပြီး Page များ ဖောင်းပွမှုမရှိစေရန် Page တည်ထောင်သည့်အခါ ဒို့မြန်မာ့လူမှုကွန်ရက်၏ ခွင့်ပြုချက်လိုအပ်ကြောင်း သိ ရသည်။
ဒိုးပြားများမှတစ်ဆင့် ငွေကြေးရှာဖွေလိုသော Page များသည် သုံးစွဲသူအနည်းဆုံး လူဦးရေ တစ်ထောင်ကို ပိုင်ဆိုင်ထားရန် လိုအပ်ကြောင်း ကွန်ရက်က ကြေညာထားသည်။
Page တည်ထောင်ခြင်းဖြင့် ၀င်ငွေရရှိစေမည့် နည်းလမ်းကို နိုဝင်ဘာလ နောက်ဆုံးအပတ်အတွင်း အကောင်အထည်ဖော် ဆောင်ရွက်ခဲ့ခြင်းဖြစ်ပြီး ဝန်ဆောင်မှုနှင့် ပတ်သက်၍ MPT မှ ၅၀ ရာခိုင်နှုန်း ၊ ဒို့မြန်မာလူမှုကွန်ရက်မှ ၁၀ ရာခိုင်နှုန်းနှင့် Page တည်ထောင်သူများမှ ၄၀ ရာခိုင်နှုန်းကို အသီးသီးခံစားရရှိမည် ဖြစ်သည်။
ဒို့မြန်မာလူမှုကွန်ရက်ကို ၂၀၁၄ ခုနှစ်က စတင်မိတ်ဆက်ခဲ့ခြင်းဖြစ်ပြီး လက်ရှိအချိန်၌ အသုံးပြုသူ အရေအတွက် နှစ်သိန်းနီးပါးကို ပိုင်ဆိုင်ထားကြောင်း သိရသည်။ ဒိုးပြားများနှင့် ငွေပေးချေမှုအတွက် MPT နှင့် ချိတ်ဆက်ထားပြီး Ooredoo ၊ Telenor တို့နှင့်လည်း ဆက်လက်ဆွေးနွေးနေကြောင်း သိရသည်။
Internet Journal
အဆင်ပြေပါစေ
ဇူးနစ်(နည်းပညာ)
